Cristina Pena Mardaras, EGIBIDEko Zuzendari Nagusi berria
Diocesanas-Jesús Obrero Fundazioaren Patronatuak ostegun honetan jakinarazi duenez, EGIBIDE ikastetxeko Zuzendaritza Nagusia Cristina Pena Mardarasek hartuko du irailaren 1etik aurrera. Horrela, José Ignacio Eguizábal ordezkatuko du, “Errefuxiatuentzako Jesuiten Zerbitzuko” (JRS) Nazioarteko Zuzendari Laguntzaile gisa etapa berri bati ekingo diona.
Cristina Pena Giza Eskubideetan doktorea da Deustuko Unibertsitatean, eta Filosofia eta Hezkuntza Zientzietan lizentziatua Bartzelonako Unibertsitatean. Askotariko prestakuntza du kudeaketaren, pedagogiaren, teologiaren eta adingabeen eskubideen babesaren arloetan, hezkuntza-testuinguruetan. Bilbotarra jaiotzez, duela ia hamarkada batetik Gasteizen bizi da, eta bere lan-etapa osoan hezkuntzaren munduarekin lotuta egon da. Bere karrera osoan zehar hainbat etapatan (Bigarren Hezkuntza, goi-mailako ikasketak, helduentzako prestakuntza…) irakasle izan da, eta hainbat ikastetxetako zuzendaritza- eta kudeaketa-karguak hartu ditu aldi luzeetan.
Cristina Penaren ustez, gaur egun, “hezkuntza-proiektu batek pertsonen hazkundean lagundu behar du, eta, haien bidez, gizarte hobea, gizatiarragoa, inklusiboagoa, baketsuagoa eta anaitasunezkoa eraikitzen”. Hau izan da bere motibazio nagusia arlo honetako 30 urteko bizitza profesionalean, Valentzian, Kanarietan eta Bogotan (Kolonbia) hainbat ikastetxe zuzendu ondoren, baita 1990etik irakasle gisa egindako lana ere.
Gaur egun, hezkuntza-lana Deustuko Unibertsitatean egiten du, Lehen Hezkuntzako Graduan eta Giza Prestakuntza Balioetan moduluan. Ignaziotar Pedagogiako Masterreko zuzendari akademikoa da, eta Deustuko Unibertsitateko Etika Aplikatuko Zentroko ikerketa-taldeko kidea.
“Nire helburua beti izan da hezkuntza-komunitateko pertsona guztien ahaleginak batzea, gaur egungo mundura bideratutako kalitatezko prestakuntza lortzeko. Gaur egungo erronkei erantzuteko prestakuntza, ikuspegi humanista bat eskainiz, gizartearen eraldaketarekin konprometitua, non pertsonak gero eta sentikorragoak izango garen errealitatearekiko, gure erantzukizunaz jabetuta, balio-plus bat emateko gai izango garen eta gure eragin-eremutik konprometituta egongo garen”.
